Zamboanga: 4MIB tiene nuevo comandante

El Armor Division, conosido antes como el 1st Mechanized Infantry Division del Philippine Army, ya inicia cambio na liderato del 4th Mechanized Infantry Battalion (MIB) base na provincia del Lanao del Norte.

Si Major General Facundo Palafox IV, el comandante del Armor Division, ya instola con Tiniente Coronel Dennis Mark Malinit, como el nuevo comandante del 4MIB durante un ceremonia de cambio del mando del Miercoles na quartel de batallon na Barangay Nangka, Balo-I, Lanao del Norte.

Si Malinit ya releva con Tiniente Coronel Joseph Marlon Famoso, quien ya sirvi por dos años como el comandante del 4MIB.

Durante el liderato de Famoso, el 4MIB efectivamente ya puede contravini con mga amenaso desde’l diferente grupo de mal elementos del sociedad y mantene buen paz y orden na ciudad de iligan, y na mga provincia del Misamis Oriental y Lanao del Norte.

Si Malinit, antes que ya designa conele como el nuevo comandante del 4MIB, ya sirvi le como el comandante del “Armor Maintenance Battalion”.

Si Malinit ya expresa su deseo de sirvir con mga vivientes y na mantencion de paz y orden na mga lugar bajo el jurisdiccion del 4MIB.

Con el ceremonia de cambio del mando del 4MIB ya atende mga alto funccionarios y representantes del ciudad de Iligan, Misamis Oriental y Lanao del Norte. (B. Garcia, photo courtesy of 4MIB)