El gobierno local ta hace el necesario preparacion del Para-games de Zamboanga na mes de Octubre, el segundo que hay conduci base na provisiones del Ordinansa 549, serie de 2020.
Titulao “Para-Games Recreational Wellness Program for PWDs including Children with Disabilities and those with Special Needs,” el ordinansa ta reflejas el esfuerzos colaborativo del division de deportes del ciudad y Unidades de Pesonas con Discapacidad bajo del Oficina de Bienestar y Desarollo Social del Ciudad.
Si Rose Ann Suarez, el jefe del Unidades de Personas con Discapacidad, ya habla el eventos para del 2024 Para-games hay inclui 100-metro carera, 50-metro y 100-metro nadada, Chess, Balón de portería para discapacidad visual o Goal Ball for Visual Disability, y volebiol sentado o sitting volleyball.
Puera de mga medallas, el mga gandadores del diferente competiciones de deportes hay recivi tamen premios de dinero.
El muy esperado evento, hay dale mira el talentos y capabilidades del mga individuales con discapacidad y necesidades especial.
El conducida del para-games es uno del mga actividades del Zamboanga Hermosa Festival na mes de Octubre. (B. Garcia)