El mga operativas del Philippine Drug Enforcement Agency (PDEA), con el suporta del policia, ya aresta dos objetivos de alto valor, o HVTs, na un operacion contra droga ilegal na Bangsamoro Autonomous Region in Muslim Mindanao (BARMM), asegun con el PDEA del Miercoles.
Asegun con el PDEA-BARMM, con el mga arestao suspechao ya conoce como canda Ebrahim Guinda Esmael, 43, y si Dali Malogayak Abdulkarim, 49, ambos mga residentes del Sultan Kudarat, Maguindanao del Norte.
Asegun con el PDEA-BARMM, canda Esmael y Abdulkarim ya aresta na un operacion de compra busto del Martes, na avenida del Gobernador Gutierrez, Barangay Rosary Heights 9, ciudad de Cotabato.
Asegun con el PDEA-BARMM, ya confisca na posesion de canda Esmael y Abdulkarim un kilo de suspechao shabu que tiene el valor de P6.8 millones, dinero de compra busto, dos celpons, y mga tarjetas de identification.
El Alcalde Bruce Matabalao del ciudad de Cotabato y si Gil Cesario Castro, el director del PDEA-BARMM, ya comenda con el mga operativas por el de ila esfuerzos implacable, que ya resulta na exitoso operacion contra drog ilegal.
Asegun con el dos oficiales, el confiscacion del un kilo de suspechao shabu ya salva mucho vida de Cotabateños.
Con el mga arestao suspechao ya detene na carcel del PDEA-BARMM en preparacion para el plantada del asunto contra canila por violacion del Ley Integral de Drogas Peligrosas de 2002. (B. Garcia)