El mga autoridad ya aresta con un chufer y ya confisca valor de P476,000 droga ilegal na un campaña contra droga na provincia del Zamboanga del Sur, asegun con el Philippine Drug Enforcement Agency-9 (PDEA-9) del Viernes.
El PDEA-9 ya nombra con el arestao suspechao como si Mharvi Dela Cruz, 48 años el edad y residente del Pueblo de Maestros (Teacher’s village), Barangay Maranding, Lala, Lanao del Norte.
Asegun con el PDEA-9, con Dela Cruz ya aresta na un “buy-bust operation” mga alas 10:35 del Jueves aga na Purok 4, Barangay Anonang, Aurora, Zamboanga del Sur.
Asegun con el PDEA-9, ya confisca na posesion del arestao suspechao 70 gramos de suspechao shabu enpaquetao na tres paquetes de plastic con el valor de P476,000, un celpon, un blanco sobre que ta contene dos balutan de “boodle money” que ya pone insima un verdadero P1,000 como markao sen, un tricycle nombrao como “Payong-Payong”, y otros pa mga cosas personal que ta inclui un portamoneda con el deseño de dollar sen.
Asegun con el PDEA-9, ya detene con el arestao suspechao en preparacion para el plantada del asunto contra conele por violacion del “Comprehensive Dangerous Drugs Act of 2002”.
Asegun con el PDEA-9, el campaña contra droga ilegal ya conduci con el suporta del policia na provincia del Zamboanga del Sur. (B. Garcia, photo courtesy of PDEA-9)