El mga autoridad ya aresta con cuatro personas y ya confisca valor de P2.8 millon contrabando na provincia del Zamboanga Sibugay, asegun con el policia del Viernes.
Asegun con Police Brigadier General Bowenn Joey Masauding, el Police Regional Office-9 director, con el cuatro personas ya aresta y mga contrabando ya confisca mga alas 3:15 del Viernes aga na Sitio Saroc-Saroc, Barangay Bangkerohan, Ipil, Zamboanga Sibugay.
Nohay nombra si Masauding con el cuatro arestao personas con quien ya entrega na custodia del policia na municipio del Ipil.
Asegun con Masauding, con el cuatro personas ya aresta durante un campaña contra contrabando que ta conduci mga personajes del policia na Sitio Saroc-Saroc, Ipil.
Si Masauding ya habla ya recubri na posesion del mga arestao suspechao “smugglers” 160 cajon de diferente clase de cigarillo que tiene el valor de P2.8 million.
Con el cuatro personas, el mga confiscao cigarillo y el vehiculo que ya usa sila para transporta con el mga contrabando ya entrega na policia del municipio del Ipil para el propio documentacion antes que ay entrega na Buro de Aduana para el propio disposicion.
Mientras tanto, si Masauding ya habla, ta esta sila comprometido na batalla contra contrabando.
“Ta asegura came con el publico cay hay continua came intensifica con el combate contra actividades de contrabado. Ay trabaja came hunto con mga concierne agencias de gobierno para investiga si donde estaba el mga cigarillos de contrabando y aresta con aquellos responsible por este comercio ilegal,” si Masauding ya habla. (B. Garcia)