Ya uni el maga varios sector del comunidad na barrio Lapakan, Zamboanga City, para fortalece el proteccion y conservacion con el Apolinario Cave.
Con el actividad, ya encabeza el Oficina Comunitario de Medio Ambiente y Recursos Naturales (CENRO) del ciudad de Zamboanga, por medio del Protected Area Management and Biodiversity Conservation Unit (PAMBCU), donde ya conduci un Communication, Education, and Public Awareness (CEPA) program sobre el conservacion y proteccion del cueva.
Total de veintinueve (29) representantes, desde diferente sector del barrio el ya participa na actividad, inclujido oficiales del barrio, organizacion de mujeres, agricultores, personas mayores, cuidadanos, joventud, y representantes estaba na religioso sector.
Durante el mentionao programa, ya orienta con el participantes aserca na leyes relatao na proteccion de cuevas y maga animal del monte, inclujido el Acto Republica No. 9072, o nombrao National Caves and Cave Resources Management and Protection Act; Acto Republica No. 9147, o Wildlife Resources Conservation and Protection Act; Decreto Presidencial No. 705, o Revised Forestry Code of the Philippines; y Acto Republica No. 9175, o Chainsaw Act of 2002.
Mas ya queda maravilloso el programa, por medio na trivia and question-and-answer games, diseño para tiene profundo comprension el participantes aserca na conservacion del cueva, mientras el maga ganadores ya recibi premio na reconocimiento del diila activo participacion.
Asegun tambien con el CENRO Zamboanga City, cay el cooperacion entre govierno y comunidad ay esencial na conservacion y proteccion de Apolinario Cave y otros pa recursos naturales para na generacion que venes. (Keith Luna)