El activo caso de coronavirus disease 2019 (Covid-19) aki na ciudad de Zamboanga ya subi ya na suma total de siento treynta’y cuatro.
El oficina de salud del ciudad ya habla cay este ya vene despues ya tene omento de catorse nuevo caso el ya registra.
Siento trenta’y uno del total de siento treynta’y cuatro activo caso de Covid-19 desde comunidad y el restante tres amo maga authorized persons outside residence o APOR.
Myentrastanto, el numero del paciente quien ya keda bueno desde Covid-19 tiene ya el suma total de veinte ocho mil siento deci-ocho cay ya tene omento de dies paciente el ya pueda cura.
Desde el tiempo ya prinicipia el pandemia, tiene tamen el suma total de mil dosientos sincuenta’y siete paciente ya muri por causa de Covid-19.
El ciudad de Zamboanga ya registra suma total de veinte nueve mil quinientos nueve caso de Covid-19 desde’l tiempo ya principia el pandemia del marso anio dos mil veinte. (Bong Garcia)