Ta prepara ya el oficina de salud del ciudad y Departamento de Educasion para el conducta del face-to-face clase na benedero abrida del escuela.
Asegun con Doctora Dulce Amor Miravite, hefe del oficina de salud del ciudad, cay su oficina en coordinacion con del Departamento de Educasyion ya principia ya conduci entreno para insinia con maga maestro y maestro si quemodo eksamina por medio de rapid antigen.
Asegun con Miravite ay distribuji sila maga antigen testing kits na maga escuela para puede usa maga maestro y maestro el momento tiene estudiante o personajes del agencia de educasion ta demonstra symtomas de coronavirus disease 2019 (Covid-19).
Si Miravite ya habla cay si tiene positivo de Covid-19 puede enseguidas separta con el estudiante y referi na su oficina para el propio accion.
Myentrastanto, asegun con Miravite cay maga personajes del difrerente distrito del su oficina ya visita ya na maga escuela para designa tal dia para claba bakuna con maga estudiante.
El oficina de salud del ciudad ya puede ya claba completo bakuna con siete sientos dies bata tiene enfermedad y sincuenta’y nueve mil siete sientos treynta’y seis bata sin enfermedad sinco hasta onse anios el edad.
Tiene ya tamen mil siete sientos cuarenta’y seis maga bata con enfermedad y noventa’y cuatro mil siento sincuenta bata sin enfermedad edad de dose hasta deci-siete el ya recivi completo bakuna.
Para na bakuna booster, mil dosientos nueve bata dose hasta deic-siete anios el edad el ya recivi ya de ila primer bakuna booster.
Si Miravite ya habla cay tiene suficiente bakuna contra Covid-19 su oficina para usa aki na ciudad. (Bong Garcia)