El autoridad ya planta ya el caso criminal contra con dos personas quien ya tira con un chufer de “habal-habal” del Octubre 11 na Barangay Cabaluay, en este ciudad, asegun con el policia local del Lunes.
Asegun con Police Major Benzar Bairulla, el hefe del Zamboanga City Police Station 3 (ZCPS3), el caso ya planta na oficina de fiscalia del ciudad mga alas 3:30 del Viernes tarde contra con el mga suspechao nombrao como canda Arvin Gonzales, 44 años el edad, y si Jonathan Lazareno, 32, ambos mga residentes del Barangay Cacao, en este ciudad.
Si Bairulla ya habla cay con Gonzales y Lazareno ya aresta na un “follow-up operation” mga alas 5:25 del tarde del Octubre 11 na Barangay Cabaluay, cuantos horas despues del incidente.
El dos acusao amo alegaomente el ya tira con el victima, si Marchel Napalcruz Dela Cruz, 33 años el edad, mga alas 2:38 del tarde del Octubre 11 na vicinidad del camposanto na Barangay Cabaluay, en este ciudad.
Durante del incident, si Dela Crus ta maneja su motorsiclo estaba na Barangay Cacao cuando ya ataja y tira conele el mga suspechao.
Si Dela Cruz ya sustene irida na su izquierda hombro y ya lleva conele para na hospital el mga “barangay tanod”.
El mga pulis ya recubri dos capsula de calibre .45 pistola na lugar del crimen.
Mientras tanto, asegun con Bairulla cay el dos arestao suspechao ta esta bajo na custodia del ZCPS3 cay ya pirma sila un “waiver” para el preliminaria investigacion. (B. Garcia)