El un reclamo de alarma y escandalo ya resulta na aresto del un retirao pulis y confiscacion de P340,000 valor de droga ilegal aqui na ciudad de Zamboanga, asegun con el policia local del Lunes.
Si Police Colonel Alexander Lorenzo, el Zamboanga City Police Office director, ya habla con el arestao persona como el retirao Police Staff Sergeant Lommel Dela Torre, 46 años el edad y residente of 5th street, Southcom village, Barangay Calarian, en este ciudad.
Asegun con Lorenzo, con Dela Torre was aresta mga alas 8:05 del Sabado denoche na su residencia na Barangay Calarian.
Antes su aresto, asegun con Lorenzo cay tiene un concierne viviente el ya reporta na Zamboanga City Police Station 8 (ZCPS8) cay si Dela Torre indiscriminadamente ya tira su pusil.
Si Lorenzo ya habla cay el mga pulis quien ya responde, mientra ta aproxima sila na casa de Dela Torre, ya puede sila uwi mga tiro y ya columbra con el retirao pulis serca na Puerta.
Sin embargo, si Lorenzo ya habla cay ya istindi si Dela Torre para adentro na su casa cuando ya gole ele el presencia del mga pulis quien ya ase apas y ya puede aresta con el retirao pulis.
Asegun con Lorenzo, ya puede confisca na posesion de Dela Torre un calibre .45 pistola con mga bala, seis capsula de semehante calibre y 50 gramos de suspechao shabu que tiene el valor de P340,000.
Ya puede tamen confisca con Dela Torre un celpon, pesador, y mga documentos del su armas de fuego.
Con Dela Torre y el mga confiscao cosas ya pone bajo na custodia del ZCPS8 para el propio disposicion. (B. Garcia, photo courtesy of ZCPS8)