Ya aresta mga otoridad con un bien “wanted” persona durante un implementacion de orden de aresto na provincia del Misamis Occidental, el mando del pulisiya rehyonal ya anuncia del Martes.
Si Police Lieutenant Colonel Helen Galvez, el portavoz del mando rehyonal del pulisiya, ya nombra con el arestao bien wanted persona como si Remegio Aplaca, 53 años el edad y residente del Purok 4, Barangay Bambong Diut, Ramon Magsaysay, Zamboanga del Sur.
Asegun con Galvez cay con Aplaca ya aresta mga personajes del pulisiya mga alas 11 del Lunes aga na Purok 2, Barangay Bunawan, Calamba, Misamis Occidental.
Si Galvez ya habla cay si Aplaca tiene pendiente orden de aresto por el crimen de “qualified statutory rape” sin piansa que ya dale el un jusgado na Aurora, Zamboanga del Sur del Hunyo 23, 2023.
Asegun con Galvez cay si Aplaca listao como el numero uno bien wanted persona na municipio del Ramon Magsaysay, Zamboanga del Sur. (B. Garcia)