Gipangunahan nila ni City Mayor Darel Dexter T. Uy ug Vice Mayor Senen O. Angeles ang pagpahigayon sa National Heroes Day Program dinhi sa dakbayan kagahapong adlawa, Agosto 28, 2023, sa may alas 8:00 ang takna sa buntag dinha sa Orchid Pavilion, Plaza Magsaysay, ning siyudad.
Ang nasangpit nga kalihokan gitambongan sa mga konsehal sa Sangguniang Panlungsod uban sa hepe ug division chiefs sa mga nagkalain-laing buhatan sa kagamhanang lokal ning siyudad, uban usab sa presensiya nila ni City Local Government Operations Officer Sherrie Charlota N. Machutes sa DILG-Dipolog, Former Dipolog City Mayor Evelyn T. Uy, 97th IB Commander, LTC Nolasco Coderos Jr, ug uban pa.
Lakip sa mga mitambong mao ang mga Uniformed Personnel gikan sa Armed Forces of the Philippines (AFP), Bureau of Fire Protection (BFP), Bureau of Jail Management and Penology (BJMP), Philippine Coast Guard (PCG), Cafgu Active Auxillary (CAA), uban usab sa hut-ong gikan sa Veterans Federation of the Philippines.
Ang nahimong pinasidunggang mamumulong mao si Col. Samuel G. Yunque, gikan sa 1st Infantry “Tabak” Division, hepe sa Governance Strategy Management Office (GSMO), kinsa naila usab nga maoy nangulo sa Scout Ranger Battalion, nga mihimo sa pag-rescue sa duha ka military vehicles, uban sa pipila ka mga kasundalohan nga na-trapped sa mga kaaway sulod sa Ground Zero atol sa Marawi Siege, kinsa mipabati sa iyang bulawanong mensahe.
(Source: Dipolog City Government Facebook page)