Ya aresta con un retirao pulis y ya confisca mas de P2.1 milyones cantidad de contrabando el mga otoridad aqui na ciudad de Zamboanga, el pulisiya local ya anuncia del Lunes.
Si Police Colonel Alexander Lorenzo, el Zamboanga City Police Office (ZCPO) director, ya nombra con el arestao suspechao como el retirao Police Staff Sergeant Hashim Tagona, un residente del kilometro 41, Sitio Sabana, Baranga Curuan, en este ciudad.
Asegun con Lorenzo con Tagona ya cuji ta transporta contrabando mga alas 2:40 del Lunes aga na carretera del Maria Clara Lorenzo Lobregat na Barangay Mercedes, en este ciudad.
Asegun con Lorenzo ta conduci “checkpoint” mga personajes del Zamboanga City Police Station 4 (ZCPS4) cuando ya ase sila para con el vehiculo ta maneja si Tagona para inspecciona.
Si Lorenzo ya habla cay durante el inspeccion, ya puede descubri mga personajes del ZCPS4 cay ta contene mga cahon de cigarillo el vehiculo ta maneja si Tagona, quien nohay puede presenta documentos del su mga cargamento.
Asegun con Lorenzo ya puede confisca na vehiculo de Tagona, que tiene pa logo del Departamento de Salud, 62 cahon y 497 “reams” de cigarillo con el valor de 2,160,000.
Con Tagona, su vehiculo y mga cigarillo ya lleva para na quartel de ZCPS4 para el propio documentacion y ay entrega despues na custodiya de Buro de Aduana. (B. Garcia, photo courtesy of ZCPS4)