Dos personas ya muri myentras uno el irido cuando ya man bangga-an el un motorsiclo y un truck de militar aqui na ciudad, asegun con el pulisiya local.
Asegun con Police Master Sergeant Jayjay Sabdani, investigador del Zamboanga City Police Office (ZCPO) Station 9 el incidente ya ocuri mga alas 4:45 Domingo tarde na Barangay Sinubong, este ciudad.
Asegun con Sabdani con el dos muerto victima ya conose como canda Randy Rico, 41 años, y si Arcel Vertudez, 40 años el edad.
Con el irido victima ya conose como si Jaycee Ramos, 25 años el edad. Todo’l victima mga residentes de Arquiza Drive, Barangay Mampang, este ciudad.
Base na investigacion cay el tres victima muntao na un motorsiclo cuando ya man bangga sila con un truck del fuersa marino despues que ya man lampas sila na curvada del camino myentras ta viaja para na Barangay Talisayan estaba na Barangay Pamucutan.
Si Rico, el chufer del motorsiclo y si Vertudez, ya muri na mismo lugar del incidente.
Asegun con Sabdani cay nohay sinti ni nada si Omar Ekong 31 años el edad y el chuper del truck del fuersa marino.
Con Ramos ya lleva el ambulancia del Philippine Coast Guard para na hospital. (B. Garcia)