Un miliciano el ya aresta y ya confisca un armas de fuego mga autoridad na implementacion del “Oplan Paglalansag Omega” aqui na ciudad, asegun con el policia local del Jueves.
El policia local ya nombra con el arestao miliciano como si Umayer Tawasil Undug, 33 años el edad y residente del Sitio Corote, Barangay Malagutay, en este ciudad.
Asegun con el policia, con Undug ya aresta durante el implementacion del Oplan Paglalansag Omega por medio de un “buy-bust operation” mga alas 8:15 del Miercoles denoche na Purok 5, Barangay Malagutay, en este ciudad.
El policia local ya habla, si Undug bajo’l supervision del 1st Infantry Division como un miembro del milicia.
Asegun con el policia, ya aresta con Undug despues que ya vende le un calibre .45 pistola y mga bala del semehante calibre de armas de fuego con un personal de inteligencia.
El policia ya habla, ya recubri na posesion de Undug un calibre .45 pistola, cuatro bala del semehante calibre de pusil, dos clip de bala, 29 pedaso del P1,000 “boodle money” que ya pone insima un verdadero P1,000 que ya usa como markao dinero.
Asegun con el policia local, con Undug ya pone bajo’l custodia del “Criminal Investigation and Detection Group” para el propio documentacion y en preparacion para el plantada del asunto contra conele por violacion del ley de republica numero 10591 o mas conosido como el “Comprehensive Firearms and Ammunition Regulation Act”.
El Oplan Paglalansag Omega es un campaña del gobierno contra armas de fuego sin licensia.
(B. Garcia)
