Un chufer de triciclo el ya aresta mga autoridad na un campaña contra droga ilegal aqui na ciudad, asegun con el policia local del Jueves.
El policia local ya nombra con el arestao chufer como si Alvin Tinguha, 25 años el edad y residente del Barangay Lunzuran, en este ciudad.
Asegun con el policia local, con Tinguha ya aresta na un “buy-bust operation” mga alas 6:30 del Miercoles denoche na Paseo de Terry Ann, Zone 3, Barangay Putik, en este ciudad.
El policia ya habla, ya recubri na posesion del Tinguha un gramo de suspechao shabu que tiene el valor de P6,800, licensia de chufer, un monedero, P300 markao dinero, y un portamoneda.
Asegun con el policia, con Tinguha ya pone bajo’l custodia del Zamboanga City Police Station 5 en preparacion para el plantada del asunto contra conele por violacion de ley de republica numero 9165 o mas conosido como el “Comprehensive Dangerous Drugs Act of 2002.”
(B. Garcia)