El mga autoridad ya confisca valor de P726,000 smuggled cigarillo na un operacion de aplicacion de ley na provincia del Zamboanga del Sur, asegun con el militar del Sabado.
Asegun con el 53rd Infantry Battalion (53IB), con el significante cantidad de smuggled cigarillo ya confisca del Jueves na Purok Talisay 2, Barangay Lower Landing, Dumingag, Zamboanga del Sur.
Asegun con el 53IB, ta conduci operacion de checkpoint el mga personajes del Bravo Company en coordinacion con el policia, cuando ya cogi sila un vehiculo ta transporta mga smuggled cigarillo.
El 53IB nohay mas menciona si cuanto personas el ya aresta durante el confiscacion del mga smuggled cigarillo.
Asegun con el 53IB, ya confisca abordo del vehiculo 652 reams de diferentes clase de smuggled cigarillo que tiene el valor de P726,000.
El 53IB ya habla, con el mga confiscao contrabando ya lleva na cuartel del policia de Dumingag para el propio documentacion y disposicion.
El operacion de aplicacion de ley ta demostra el inquebrantable dedicacion del militar y policia para combate actividades de smuggling y asegura el paz y orden na region. (B. Garcia)