El mga autoridad ya confisca P573,000 valor de contrabando na un operacion de aplicacion de ley na provincia del Zamboanga del Sur, asegun con el policia del Viernes.
Asegun con el mando regional del policia, o PRO-9, con el mga contrabando, compuesto de smuggled cigarillo, ya confisca mga alas 12:30 del Miercoles aga na canto’y aplaya del Barangay Metokong, Dumalinao, Zamboanga del Sur.
Asegun con el PRO-9, ta conduci patrulla maritima el mga operativas del Zamboanga del Sur Maritime Police Station (ZDS MARPSTA) en coordinacion con el Zamboanga del Sur Police Provincial Office y Buro de Aduana cuando ya columbra sila con dos personas tiene cosa ta descarga desde un banca de motor.
El dos personas ya istindi cuando ya gole sila con el mga operativas, quien ta atraca serca na banca de motor para verifica si cosa sila ta descarga.
Asegun con el policia, el mga operativas ya confisca 10 cajon de diferentes clase de ciragillo con el estimao valor de P573,000.
Con el mga confiscao contrabando y banca de motor ya entrega na custodia del ZDS MARPSTA para el propio documentacion y disposicion.
Asegun con el PRO-9, ta continua el investigacion para determina si quien el mga individuales el envuelto na smuggling del mga confiscao cigarillo. (B. Garcia)