El mga autoridad ya cogi na acto con un pescador ta man pesca usando explosivo na mar del provincia de Tawi-Tawi, asegun con el policia del Domingo.
El Philippine National Police-Maritime Group (PNP-MG), ya nombra con el arestao pescador como si Alias Ali, con quien ya aresta el mga personajes del 1st Special Operations Unit, Maritime Group (1SOU-MG).
Asegun con el PNP-MG, con Ali ya aresta na acto ta usa explosivo mientras ta pesca na mar del municipio de Bongao, el capital del provincia de Tawi-Tawi del Sabado.
Asegun con el PNP-MG, el mga personajes del 1SOU-MG ta conduci patrulla maritima cuando ya cogi sila na acto con Ali ta pesca usando improvisado dinamita despues que ya uwi mga rebentada de explosivo na mar de Bongao.
Asegun con el PNP-MG, el mga operativas del 1SOU-MG ya confisca tres botella que ta contene ammonium nitrate, un comon ingridiente de explosivo.
Con Ali y el mga confiscao evidencia ya lleva na quartel del 1SOU-MG para el documentacion y propio disposicion.
Si Police Brigadier General Jonathan Cabal, el director del PNP-MG, ya promete continua combate contra pescada de dinamita, reafirmando el dedicacion del PNP-MG para proteje con el comunidaddes desde’l peligro del clase de ilegal practica. (B. Garcia)