El mga autoridad ya captura con un persona mas buscada siguiendo el sinco horas tirahan na provincia del Lanao del Sur, asegun con el policia del Martes.
Si Police Colonel Robert Daculan, el director del policia na provincia del Lanao del Sur, ya identifica con el capturao persona mas buscada como si alias Pikoy, de legal el edad.
Asegun con Daculan, con Pikoy ya captura despues el sinco horas tirahan que ya principia mga ala 1 del Sabado aga na Barangay Dimapatoy, Bubong, Lanao del Sur.
Asegun con Daculan, el tirahan ya ocuri despues que alegaomente ya tira si Pikoy cuando ya gole ele con el presencia del mga autoridad, quien aquel tiempo para servi orden de aresto contra conele.
Si Daculan ya habla, si Pikoy ya iri durante el tirahan que ya resulta na de suyu capturada. Con Pikoy ya lleva na Amai Pakpak Medical Center para el curada medical.
Si Daculan ya habla, si Pikoy tiene pendiente orden de aresto sin recomendao piansa por el crimen de matansa que ya dale el un corte na ciudad de Marawi, Lanao del Sur.
Asegun con Daculan, si Pikoy alegaomente responsable na matansa del su mismo tia, si Noraisa Mansuk Manua, del Octubre 23, 2024.
Asegun con Daculan, si Pikoy listao como el numero seis persona mas busca na provincia del Lanao del Sur y el numero uno personas mas buscada na municipio del Bubong.
Si Daculan ya habla, si Pikoy hay enfrenta otro caso por violacion del ilegal posesion de armas de fuego y bala cay el mga operativas ya recubri na su posesion un rifle M16 con mga bala.
Asegun con Daculan, el servida del orden de aresto con Pikoy ya conduci el mga pulis en coordinacion con el Moro Islamic Liberation Front Ceasefire Committee on the Cessation of Hostilities (MILF CCCH). (B. Garcia)