El Departamento de Obras Publicas y Carreteras o DPWH ya construi P5 millon estractura de proteccion de abajada na un barrio na provincia del Zamboanga del Norte para asegura el segurao viajes.
El oficina regional del DPWH ya habla el proyecto de proteccion de abajada ya implementa na canto’y camino del Barangay Tinindugan, Sergio Osmeña, Zamboanga del Norte.
Asegun con el DPWH, el alocacion de P5 millon, que ya saca desde’l General Appropriations Act del 2024, ya usa para completa con el gaviones, estractura del proteccion de abajada, con el total largor de 101 metros, que ya inclui el construccion de drenaje.
“El nuevo proyecto ta servi como obstaculo contra erosion del tierra que firmi ta socede especialmente durante el tiempo’y aguacero,” el oficina regional del DPWH ya habla.
“Con el completada del proyecto, enbuenamente ya ahora ta travesa na empinado y montenoso camino el mga motorista, particularmente mga siembrador entregando de ila producto agricultural,” asegun con el DPWH.
Con el proyecto ya implementa el oficina de enginieria del primer distrito del DPWH na Zamboanga del Norte. (B. Garcia)