Dos personas buscada el ya aresta el mga autoridad durante un operacion simultanea de aplicacion de ley contra criminalidad na provincia del Zamboanga del Norte, asegun con el police regional del Miercoles.
Si Tiniente Coronel Helen Galvez, el portavoz del mando del policia regional, ya nombra con el mga arestao personas buscada como canda Nestor Apanon, 32 años el edad, y Redjan Gumabat, 28, ambos mga residentes de Barangay Tinuyop, Leon B. Postigo, Zamboanga del Norte.
Si Galvez ya habla, con Apanon ya aresta mga personajes del policia y militar maga alas 11:50 del Martes aga na Barangay Goleo, Sindangan, Zamboanga del Norte.
Asegun con Galvez, si Apanon tiene pendiente orden de aresto por el crimen de frustrao matansa con recomendao piansa de P200,000 que ya dale el un corte na Sindangan de Marso 13, 2023.
Si Galvez ya habla, con Gumatad ya aresta mga personajes del policia y militar mga ala 1:20 del Martes tarde na Barangay Goleo, Sindangan.
Si Gumabat tiene pendiente orden de aresto por el crimen de probao matansa con recomendao piansa de P120,000 que ya dale el un corte na Sindangan del Marso 22, 2021.
Asegun con Galvez, ambos con Apanon y Gumabat ya pone bajo’l custodia del policia na municipio de Sindangan, Zamboanga del Norte.
(B. Garcia, photo courtesy of Police Regional Office-9)
