El mga autoridad ya aresta con el suspechao na matansa del man maridable negociantes del Miercoles na Barangay Boalan, ciudad de Zamboanga, asegun con el policia.
El policia ya identifica con el arestao suspechao como si Rolando Jumawan, 61 años el edad, un residente del ciudad de Isabela, provincia de Basilan.
Asegun con el policia local, con Jumawan ya aresta el mga operativas del Jueves aga na Barangay Calvario, ciudad de Isabela.
El policia ya habla, ya puede sila obtene evidencia critical que ya resulta na identificacion y aresto del suspechao por medio del meticuloso y coordinao esfuerzos del mga operativas del Zamboanga City Police Office y Zamboanga City Police Station 5.
Tiene tamen mga testigos el ya identifica positivamente con el suspechao, solidificando mas el caso que hay planta contra conele.
Asegun con el policia, si Jumawan amo el alegaomente responsable na matansa del man maridable negociantes, Fathie Bara Loong y su esposa, Bairy (hinde Elma como ya reporta de mas temprano), mga alas 8:55 del Miercoles aga na carretera del Maria Clara Lorenzo Lobregat na Barangay Boalan, ciudad de Zamboanga.
Asegun con el policia, base na investigacion preliminar, el incidente relatao na en curso disputa de tierras entre el suspechao y mga victimas. (B. Garcia)