Un “high-value target” suspechao el ya aresta y valor de P102,000 droga ilegal el ya confisca na un campaña contra droga na Zamboanga Sibugay, asegun con el Philippine Drug Enforcement Agency (PDEA) del Martes.
Asegun con Jury Rocamora, el hefe del PDEA na provincia de Zamboanga Sibugay, con el arestao HVT suspechao ya conose como si Gima Mojackarin, 47 años el edad.
Si Mojackarin amo el numero seis suspechao na lista del PDEA na vendida de droga ilegal na region.
Asegun con Rocamora, con Mojackarin ya aresta na un “buy-bust operation” mga alas 10:13 del Lunes aga na Purok Venus, Barangay Bangkerohan, Ipil, Zamboanga Sibugay.
Si Rocamora ya habla cay con Mojackarin ya aresta despues que ya bende le droga ilegal con un secreta del PDEA.
Asegun con Rocamora ya puede recubri na posesion de Mojackarin 15 gramos de suspechao shabu enpaketao na catorse pakete de plastic que tiene el valor de P102,000, un bolsa-bolsa, un silver foil de cigarillo y 18 pedaso del P1,000 “boodle money” que ya usa na buy-bust operation.
El buy-bust operation en contra con Mojackarin ya conduci el combina grupo del PDEA, policia, y militar.
Con el arestao suspechao ya pone bajo na custodia del PDEA na Zamboanga Sibugay en preparacion para el plantada del asunto en contra conele. (B. Garcia) (Photo Courtesy of PDEA- Zamboanga Sibugay)