Zamboanga: 4 muerto, 3 irido na bangga-an de 2 trak

0
6

 

 

 

 

Cuatro personas ya muri mientras tres otro el ya iri cuando un trak ta transporta puerco ya man bangga con otro trak na un lejanos barrio aqui na ciudad, asegun con el policia local del Martes.

Asegun con Police Captain Jova Agustin, el hefe del Zamboanga City Police Station 1 (ZCPS1), el accidente ya ocuri na carritera del Maria Clara Lorenzo Lobregat (MCLL) na Sitio Tigbao, Barangay Licomo, en este ciudad, mga alas 5:30 del Martes aga.

Si Agustin ya habla cay el trak ta transporta puerco que ta maneja si Herbert Dela Rosa, 33, con seis pasajeros, ta viaja para na pueblo cuando ya man bangga sila na atras lao derecha de otro trak que ta maneja si Elowino Lorenzo.

Asegun con Agustin, ta man atras si Lorenzo para na carritera del MCLL cuando ya ocuri el bangga-an.

Si Agustin ya habla cay el trak ta maneja si Dela Rosa ya man bangga na un poste de electricidad despues que ya man bangga con el trak ta maneja si Lorenzo.

Asegun con Agustin, cuatro del pasajeros de Dela Rosa nombrao como canda Rosiller Tomotong, 30 años el edad, Ariel Manos, 32, Bobong Magat, 50, y un tal Noli, ya lleva para na “Vitali lying-in clinic” pero ya declara canila muerto del doctor.

Con Dela Rosa y dos otro pasajeros, si Jerry Boy Bartolome, 26, y si Felix Santos, 22, ya leva para na “Ipil Medical Center” para el curada medical.

El mas de un dozen puerco que ya transporta si Dela Rosa ya muri tamen durante el accidente.

Asegun con Agustin nohay pasa nada con Lorenzo durante el accidente. (B. Garcia) (Photo Courtesy of ZCPS1)

 

Leave a Reply