Cagayan de Oro – KAPIN sa P500 milyones ang balor sa 24 ka mga proyekto sa imprastraktura ang gipaabot nga mapatuman sa umaabot tuig 2024. Kini ang nasukip sa giuyonan sa Konseho sa Syudad ubos ni Bise Mayor Bebot Rodriguez nga 2024 Annual Investment Program (AIP).
Lakip niini ang P90 milyones balor nga pagsemento sa mga dalan sa Barangay Dansolihon, Tignapolaon ug Pigsag-an; pag-abli og dalan balor P40 milyones dinha sa Barangay Tumpagon ug Pagalungan; pagtukod og flood mitigation structures balor P125 milyones dinha sa Bigaan River Upstream Cugman ug Gusa, Cugman River sa FS Catanico ug Tablon nga bahin, Cabag-asan Creek, Alae River sa Barangay Bugo, ug Agusan River sa Barangay Tablon.
Gigahinan usab sa umaabot nga tuig ang P10 milyones nga proyekto pagtukod og slope protection structure sa Besigan Barangay Road ug P124 milyones kapin nga proyekto sa road reblocking/improvement dinha sa Camaman-an, Carmen-Canitoan, Kauswagan, Pagatpat-San Simon, Tomas Saco Street, San Simon-Baikingon, PN Roa Main Road, Dansolihon-Balongkot, Macanhan, Carmen ug uban pang mga dalan sa sentrong bahin sa syudad.
News and photo courtesy of CdeO City Council