Usa ka dakong kasaysayan sa pagtuo, kultura, ug panulundon sa Sugbo ang nasaksihan sa Marso 13, 2025, sa pormal nga pagbalik sa Boljoon pulpit panels ngadto sa Arkidiyosesis sa Sugbo.
Ang National Museum of the Philippines (NMP) opisyal nga nag-turnover sa maong panels atol sa usa ka seremonya nga gipahigayon sa Cebu Cathedral Museum.
Niapil sa maong panghitabo sila Cebu Archbishop Jose Palma, Department of Tourism Secretary Christina Garcia-Frasco, Cebu Governor Gwendolyn Garcia, ug NMP Chairman Andoni Aboitiz.
Ang maong sagradong panels, nga adunay matahom nga kinulit nga mga imahe sa mga Agustinianong santos, nawala sukad pa sa 1980s ug giisip nga dili na mabalik. Apan, human sa dugay nga pagpangita ug paningkamot, nahibalik na kini sa ilang tinuod nga tag-iya—ang Arkidiyosesis sa Sugbo.
Gipresentar ang matag panel ngadto ni Archbishop Palma ug gilantaw sa publiko atol sa turnover ceremony. Aron masiguro ang ilang pagka-orihinal, gikuhaan kini og wood specimen alang sa radiocarbon dating, nga ang resulta gilauman sulod sa duha ka semana. Ang Kapitolyo sa Sugbo ang mogasto sa maong proseso.
Si Gobernador Gwen Garcia mipadayag sa iyang kalipay sa maong panghitabo nga sa taas nga panahon nabalik na kini sa orihinal nga tag iya.
Si Secretary Christina Frasco miingon nga usa kini ka kadaugan sa pagtoo, panulundon, ug kasaysayan.
Si Archbishop Palma mipasalamat kang Gobernador Garcia sa iyang paningkamot sa pagpabalik sa panels.
Si Boljoon Mayor Jojie Derama mipadayag sa iyang pasalamat ngadto kang Gob sa paninglamot nga nabalik kini ug me ko konsiderar nga panulundon ug kultura.
Sa Marso 14, dad-on ang panels balik sa Boljoon, diin makalantaw ang publiko. Sa Marso 21, usa ka Pontifical Mass ang ipahigayon, diin magwali si Archbishop Palma sa pulpito, nga magpakita sa katahum sa napreserbar nga panels.
Kini nga panghitabo usa ka dakong kalampusan sa pagpanalipod sa relihiyosong panulundon sa Sugbo, nga nagpakita sa pagkahiusa sa mga Sugboanon sa ilang kultura ug kasaysayan. (Renante Socia Lada)
(Source: Cebu Capitol PIO)