Cuatro personas ya aresta mientras valor de P105,000 valor de contrabando el ya confisca mga autoridad na provincia del Zamboanga del Sur, el pulisiya ya anuncia del Martes.
Asegun con Police Colonel Diomarie Albarico, el director del pulisiya na provincia del Zamboanga del Sur, el aresto y confiscacion ya ase del alas 6:30 del Sabado denoche na carretera nacional na Barangay Tiguma, ciudad de Pagadian.
Si Albarico ya nombra con el mga arestao suspechao como canda Bonifacio Bolleno, 26; Fersibal Asad, 39; Elyamer Alvarez, 18; y si Nasil Manasil, 37.
Asegun con Albarico, ta conduci “checkpoint” mga pulis y soldao cuando ya ase sila para con un trak ta maneja si Bolleno para inspecciona.
Durante el inspeccion, asegun con Albarico, ya descubri mga pulis y soldao cay ta contene el trak 300 reams de cigarillo que tiene el valor de P105,000.
Si Albarico ya habla cay enseguidas ya confisca con el mga cigarillo despues que ya falya si Bolleno y su mga compañeros presenta documentos del de ila cargamento.
Con el mga confiscao cigarillo, el trak y mga arestao personas ya entrega na pulisiya del ciudad de Pagadian para el propio disposicion. (B. Garcia)