Cuatro personas, incluido tres individual de alto valor o high-value individual (HVI), el ya aresta y mas de P1.9 millones valor de droga ilegal, granada y pusil el ya confisca na separao operaciones contra droga na provincia del Sultan Kudarat, asegun con el Area Police Command-Western Mindanao (APC-WM) del Lunes.
El APC-WM ya nombra lang con el mga arestao suspechao como el mga siguientes: Bata, 42 años el edad; JB, 20; Mani, 52; y si Odin, 49 años el edad.
Asegun con el APC-WM, con Bata y JB, quien ambos mga HVI suspechao, ya aresta na operacion de compra busto del Jueves, na Purok 3, Barangay Barurao 2, Lebak, Sultan Kudarat.
El APC-WM ya habla, ya confisca na posesion del ila dos 168 gramos de suspechao shabu que tiene el valor de P1,142,400, y un granada.
Con Mani ya aresta na otro operacion de compra busto del Jueves na Zone 6, Barangay Cadiz, Kalamansig, Sultan Kudarat.
Asegun con el policia, ya confisca na posesion de Mani 80 gramos de suspechao shabu enpaquetao na sinco sobrecitos plastico que tiene el valor de P544,000.
Con Odin ya aresta na otro operacion de compra busto del Jueves na Purok Mangga, Barangay Poblacion 1, Lebak, Sultan Kudarat.
Asegun con el policia, ya recubri na posesion del Odin valor de P300,000 droga ilegal enpaquetao na sinco sobrecitos plastico, y un calibre .45 pistola con clip y seis bala.
Asegun con el APC-WM, ya detene con el mga suspechao en preparacion para el plantada del asunto contra canila na corte. (B. Garcia)