El Commission on Elections (Comelec) ya reporta cay 2,000 ya mga nuevo votantes el ya registra na segundo distrito del ciudad de Zamboanga, asegun con el oficial del Comelec del Lunes.
Asegun con el Abogao John Cristian Babiera, el oficial de eleccion na segundo distrito, el numero del votantes na su jurisdiccion ya subi ya na 245,000 desde 243,000 incluido nuevo registrants y transferidos.
El segundo distrito ta cubri con el 61 del 98 barangay del ciudad de Zamboanga.
Asegun con Babiera, el omento de populacion na segundo distrito amo el uno del mga rasones ya omenta el numero del mga votantes.
El mga nuevo registrantes amo aquellos quien ya llega ya na edad de 18 años y tambien aquellos quien hay llega 18 años el edad antes el medio termino eleccion na otro año.
Asegun con Babiera, posible mas hay omenta pa el numero del nuevo votantes cay ta continua el registracion de nuevo votantes para el medio termino eleccion na otro año.
El registracion ya principia del Febrero y hay termina na Septiembre 30, este año. (B. Garcia)