El combina operativas del Buro de Aduana y Regional Special Operations Unit-9 (RSOU-9) ya aresta dos personas y ya confisca valor de P425,000 smuggled asucar na ciudad de Zamboanga, asegun con un official de Aduana.
Si Michael Lanza, el jefe del del field station del Customs Intelligence and Investigation Service, ya identifica con el dos arestao personas como canda Radzmer Asgali, 34 años el edad, y si Almujib Buji, 18 años el edad.
Asegun con Lanza, canda Asgali y Buji ya aresta el combinao grupo de personajes del Buro de Aduana na pantalan del Zamaonga y RSOU-9 mga alas 5:30 del Lunes tarde na un privado pantalan na Barangay Baliwasan, ciudad de Zamboanga.
Asegun con Lanza, antes del aresto del dos personas, el mga operativas del RSOU-9 ya recivi informacion sobre el presencia del un vehiculo que ta transporta smuggled asucar.
Enseguidas el mga operativas del RSOU-9 ya coordina con el Buro de Aduana y ya columbra sila un vehiculo mietras na vicinidad sila de privado pantalan na Barangay Balwisan.
El combinao personajes del Buro de Aduana y RSOU-9 ya descubri el vehiculo lleno de mga saco de asucar cuando ya hace sila para y inspecciona con el vehiculo.
Asegun con Lanza, ya aresta con Asgali y Buji y ya confisca con el mga saco de asucar despues que ya falia sila presenta documentos del de ila cargamento.
Asegun con Lanza, con Asgali y Buji ya pone bajo del procedimiento de investigacion na fiscalia del ciudad del Martes por violacion del ley contra el contrabando Agricola del 2016 y Customs Tariff and Modernization Act.
Si Lanza ya habla, el mga confiscao asucar estaba de Thailand y ya lleva na ciudad de Zamboanga pasando na provincia del Sulu. (B. Garcia)