Dos personas mas buscada, incluido un rebelde New People’s Army (NPA), el ya aresta el mga autoridad na operacion de aplicacion de ley na Zamboanga Peninsula, asegun con el policia del Miercoles.
Si Police Brigadier General Bowenn Joey Masauding, el director del mando regional del policia, o Police Regional Office-9 (PRO-9), ya identifica con el dos aresta persona mas buscada como canda Jemwel Paica Timaloy, un rebelde NPA, y si Erante Cabiara Sayson.
Asegun con Masauding con Timaloy ya aresta el combina operativas de policia y militar na un operacion de aplicacion de ley por media na implementacion del un orden de aresto mga alas 7:15 del Martes aga na Barangay Lower Baluran, Imelda, Zamboanga Sibugay.
Asegun con Masauding, si Timaloy listao como el numero seis persona mas buscada na provincia del Zamboanga del Norte y tiene pendiente orden de aresto por el crimen de intentao multiple matansa que ya dale el un corte na Sindangan, Zamboanga del Norte.
Asegun con Masauding, con Timaloy ya pone bajo’l custodia del policia na municipio de Sindangan, Zamboanga del Norte para el propio disposicion.
Si Masuading ya habla, con Sayson ya aresta mga alas seis del Lunes denoche na Purok 5, Barangay Piao, Roxas, Zamboanga del Norte.
Asegun con Masauding, si Sayson listao como el numero nueve persona mas buscada na provincia del Zamboanga del Norte y tiene pendiente orden de aresto por el crimen de estatutorio abuso carnal que ya dale el un corte na ciudad de Dipolog, Zamboanga del Norte.
Con Sayson ya pone bajo’l custodia de Criminal Investigation and Detection Group na Zamboanga del Norte para el propio disposicion.
Si Masauding ya comenda con el mga operativas por el exitoso aresto del dos personas mas buscada. (B. Garcia)