Un “high-value target (HVT)” vendedor de droga ilegal el ya aresta y valor de P34 millon suspechao shabu el ya confisca mga autoridad na ciudad de Cotabato, asegun con el Philippine Drug Enforcement Agency (PDEA) del Martes.
Asegun con Gil Cesario Castro, el director del PDEA na Bangsamoro Autonomous Region in Muslim Mindanao (PDEA-BARMM), con el arestao HVT suspechao ya conose como si Zacaria Nandang, alias Dats, 30 años el edad, y un residente del Barangay Bagua 2, ciudad de Cotabato.
Asegun con Castro, con Nandang ya aresta na un operacion de compra busta mga ala 1:20 del Lunes tarde na Barangay Matalin, Malabang, Lanao del Sur.
Asegun con Castro ya confisca na posesion de Nandang sinco kilos de suspechao shabu enpaquetao na sinco bag de plastico que tiene escribida de Chino con el valor de P34 millon, dinero de compra busto, un celpon, varias tarjetas de identificacion, recivo de transferida de dinero, y un vehiculo.
Si Castro ya habla, con Nandang ya aresta el mga agentes del PDEA-BARMM con el todo suporta del policia, militar, y National Intelligence Coordinating Agency.
Asegun con Castro, si Nandang envuelto na negocio de droga ilegal na mga municipios na provincia del Lanao del Sur, Maguindanao del Sur, Maguindanao del Norte, puera na ciudad de Cotabato.
Si Catro ya habla, ya detene con Nandang en preparacion para el plantada del formal asunto contra conele por violacion del “Comprehensive Dangerous Drugs Act of 2002”. (B. Garcia)