El mga personajes del “Coast Guard Station (CGS)-Zamboanga Sibugay” ya salva con un varco de pesca con 10 tripulantes na mar del provincia de Zamboanga Sibugay, asegun con el CGS-Zamboanga Sibugay del Martes.
Asegun con el CGS-Zamboanga Sibugay, con el varco de pesca con 10 tripulantes ya salva mga alas 10 del Domingo Denoche na mar del municipio de Olutnaga, Zamboanga Sibugay.
Base na investigacion, ya queda malo el makina del varco de pesca nombrao como el FB JAK cuando ya dale con este encuentro grande-grande mareada mientras ta navega na mar del Olutanga.
Asegun con el CGS-Zamboanga Sibugay, con el FB JAK y su mga tripulantes ya puede salva despues que imedietamente ya imbia “search and rescue team” el “CGS-Sub-Station Olutanga” despues de recivi’r informacion sobre el condicion del varco de pesca.
Con el varco de pesca exitoso ya hala para na pantalan del municipio de Olutanga.
Asegun con el CGS-Zamboanga Sibugay, el exitoso salvada con el varco de pesca con 10 tripulantes es un resulta del colaborativo esfuerzo del mga concierne residentes por medio de informa’r imedietamente con mga autoridad sobre el incidente na mar. (B. Garcia)