El Zamboanga City Police Office (ZCPO) ya anuncia cay ya planta ya formal asunto criminal contra con el suspechao na incidente de tiroteo na Barangay San Roque, este ciudad.
Asegun con Police Colonel Alexander Lorenzo, el ZCPO director, ya planta ya asunto de “frustrated murder” contra con Juani Hassanal alias Sanal, 30 años el edad, un residente de Paseo de Ruste, Barangay San Roque, este ciudad.
Asegun con Lorenzo cay el asunto contra con Hassanal ya somete na oficina del fiscaliya mga alas 4 del Sabado tarde.
Con Hassanal ya aresta mga pulis durante un “follow-up operation” cuantos minutos despues que alegaomente ya tira le del Agosto 24 con Gerale Plaza, 25, años el edad.
Asegun na investigacion cay ta para si Plaza na un eskinita na Paseo de Mariano, Sitio Margarita, Barangay San Roque, cuando si Hassanal, quien ta maneja motorsiclo aquel tiempo ya para enfrente y sin provicacion ya tira con el victima.
Si Plaza ya sufri tres irida de bala, uno na su derecha ombro y dos na su derecha pierna. Admitido el victima na ospital.
Agrabio persona el motivo del incidente, asegun con el pulisiya local. (B. Garcia, photo courtesy of ZCPO)