El Philippine Army ya designa un graduao miembro del Philippine Military Academy (PMA) del año 1991 como el nuevo comandante del 11th Infantry Division (11ID) base na provincia del Sulu, asegun con el militar del Sabado.
El nuevo instolao comandante del 11ID amo si Brigadier General Leonardo Peña, quien ya releva con Major General Ignatius Patrimonio, un producto tamen del PMA del año 1991, y hay retira na servicio militar na Agosto 14.
Con Peña ya instola durante el ceremonia de cambio del mando del Viernes que ya encabesa si Tinienete General Roy Galido, el comandante del Philippine Army.
Antes de su nuevo posicion, si Peña ya servi como el asistente comandante del terser division del Philippine Army.
Durante el ceremonia de cambio del mando, si Galido y el Western Mindanao Command ya regala medalla y plaque del mando con Patrimonio por su distinguido, meritorioso y invaluable servicio como comandante del 11ID desde Febrero 23, 2022 hasta Agosto 9, 2024.
Si Patrimonio ya rendi gracias con el mando militar y tropas del 11ID por su remarkable experiencia como el comandante del 11ID.
Mientras tanto, si Peña ya expresa su gratitud por el compiansa ya dale conele como el nuevo instolao comandante del 11ID. (B. Garcia)