El clase de cara-cara na todo nivel ambos na escuelas publico y privado na ciudad ya cancela principiando este dia de Jueves hasta mañana, Viernes, por causa del extremo calor que ta lleva el penomena de el niño.
El Alcalde John Dalipe ya ordena el cancelacion del clase de cara-cara base na Resolucion Numero 1 que ya aprova durante el hunta del Zamboanga City Task Force El Niño del Martes.
El alcalde igualmente ya diriji el adopcion del el flexible scedule de trabajo para con mga vulnerable grupo como mga personas con disabilidad, personas mayores, mujeres ta lacta y preñada, y aquellos con comorbidad, na mga local y nacional oficinas y agencias de gobierno.
Mientras tanto, el jefe ejecutivo esperansao dale un orden ejecutivo, para concuri el consejo del ciudad, que ya autoriza con mga administrador de escuelas y jefe de oficina de gobierno implementa flexilbe scedule de trabajo para con mga vulnerable grupo o empleyados ental caso ay subi na 40 grados Celsius el indice de calor. (B. Garcia)