El 6th Infantry Division (6ID) del Philippine Army ya inicia cambio na liderato del 105th Infantry Battalion (105IB) base na provincia del Sur Cotabato, asegun con el militar del Domingo.
Asegun con el 6ID, ya instola con Teniente Coronel Erikzen Dacoco como el nuevo comandante del 105IB, relevando con Teniente Coronel Dante Gania.
Si Brigadier General Donald Gumiran, el comandante del 6ID, amo el ya encabesa con el ceremonia de cambio de mando del Sabado na cuartel del 105IB na Sitio Matinong, Barangay Little Baguio, Surallah, Sur Cotabato.
Si Guimiran ya expresa su gratitud con Gania, el primer comandante del 105IB por su dedicao servicio dentro de dos años.
Si Gumiran ya nota, significamente ya debilita el batallon con el influencia del grupo de terorista comunista, o CTG, dentro del su lugar de operaciones particularmente na Sur Cotabato bajo na liderato de Gania.
Si Gumiran ya habla, el esfuerzos de Gania efectivamente ya previni con el CTG lanzada actividades violentas, contribuyendo una mayor estabilidad regional.
El 105IB ya facilita tamen con el exitoso rendida del nueve personalidad CTG, avanzando mas el iniciativas de paz y seguridad del gobierno.
En su comentarios, si Gumiran ya desafia con Dacoco para encabesa con el 105IB con igual nivel de passion y dedicacion, continuando con el mision del unidad na mantencion de paz y seguridad na region.
Con el 105IB oficialmente ya activa del Febrero 4, 2023, durante un ceremonia na Campo Paulino Santos na Barangay Dado, Alamada, Norte Cotabato.
El ceremonia del cambio del mando ya atende mga oficiales clave del 6ID, alistado personajes, distinguidos invitados, y otro partes interesedas, descatando el significancia del transicion de liderato del en curso mision del batallon. (B. Garcia)