Seis miembros del grupo Abu Sayyaf ya rindi y ya entrega mga armas de fuego por medio del programa de integracion social localizado (Localized Social Integration Program) na provincia del Sulu, asegun con el military del Miercoles.
El 11th Infantry Division (ID) ya nombra con el seis rendidores como el mga siguientes: Leoner Sahiron alias Baby Boy; Saupar Jilan Asing alais Abutarik; Alsid Jalaidi alias Al; Ridmar Absara Alih alias Alvares; Jamal Arabani Abdusail alias Jamal; y si Aldi Hasim Minis alias Aldison.
Asegun con el 11ID, el seis miembros del grupo Abu Sayyaf ya rindi del otro semana por medio del esfuerzos de colaboracion del 41st Infantry Battalion, 11th Military Intelligence Battalion, y el Tactical Operations Group Sulu-Tawi-Tawi.
Si Brigadier General Mario Jacinto, el comandante del 1101st Infantry Brigade (1101IBde), ya presenta con el seis Abu Sayyaf rendidores con Major General Ignatius Patrimonio, el comandante del 11th Infantry Division, durante un ceremonia na quartel del 1101IBde na Bud Bayug, Talipao, Sulu.
Si Patrimonio ya reconoce con el seis Abu Sayyaf retornados cay ya escuji sila vivi un normal vida.
Asegun con Patrimonio, el de ila decision de rindir, tiene positivo efecto na de ila familia y comunidad y ya motiva le canila para suporta con el plano del gobierno para termina con el conflicto armado local y otro actividades violentes. (B. Garcia, photo courtesy of 11ID)
