Irido el un oficial del barrio na provincia de Basilan na un incidente de tiroteo aqui na ciudad de Zamboanga, el pulisiya ya habla el Martes.
Asegun con el Zamboanga City Police Station 5 (ZCPS5) el incidente ya ocuri mga alas 8:35 del Lunes denoche na Zone 6, Calle Unidad, Barangay Lunzuran, este ciudad.
El ZCPS5 ya nombra con el victima como si Salam Mujala Yusop, 57 años el edad, y el barrio capitan del Barangay Benembengan, Sumisip, Basilan.
Base na investigacion cay ta man ejercisio si Yusop enfrente del su residencia cuando ya aparece el suspechao ya sopla de tiro con el oficial del barrio Benembengan.
Asegun con el ZCPS5 cay mismo si Yusop ya conose con el suspechao y con este ya nombra como si Vicente Locson, un residente de Barangay Timpul na ciudad de Isabela, el cabesera del provincia de Basilan.
Asegun con el pulisiya cay maskin irido ya si Yusop, ya puede corre el victima para saka su pusil na segundo piso del su casa y ya tira tamen con el suspechao.
Si Yusop ya sufri irida de bala na su isquierda pierna y ya lleba conele na ospital su familya.
El suspechao ya escapa cuando ya imbisti conele si Yusop y objeto ahora del enubuscada del pulisya local. (B. Garcia, photo courtesy of ZCPS5)