El 53rd Infantry Battalion (53IB) ya recivi tres nuevo designao oficiales y personal alistado y ya reconoce con el servicio excepcional del un retirando soldao na un ceremonia del Lunes, asegun con militar.
El ceremonia ya conduci na Campo Major David Sabido que ta servi como el casa del cuartel del 53IB na municipio del Guipos, Zamboanga del Sur.
El mga nuevo designao oficiales y personal alistado que ya recivi el 53IB amo el mga siguientes: 2nd Lieutenant (2Lt.) Lanz Anthony Espino; 2Lt. Benzerr James Novesteras; 2Lt. John Rey Padilla; Staff Sergeant Juvy Librando; y, Staff Sergeant Allan Eribuagas.
Ya pone na de ila uniforme el parche del 53IB que ta simboliza cay parte ya sila de unidad.
El Plaque de Reconocimiento ya presenta con Sergeant Noel Enriquez por su exemplario servicio con el Philippine Army por el mas del su 21 años de servicio.
El inquebrantable dedicacion de Enriquez defende con el alto estandarte de servicio militar, reflejando gran credito con su mismo cuerpo y el organizacion.
Na su mensaje, si Teniente Coronel Rolando Vargas Jr., el comandante del 53IB, ya expresa su gratitud con el mga nuevo designao personajes y el premiado.
“Su dedicacion y servicio amo el forca vital de exito del de aton batallon. Para con Sargento Enriquez, gracia por el de tuyu inquebrantable dedicacion y lealtad. Bienvenido na Matapat batallon con el de aton mga nuevo oficiales y personal alistado. Hunto, hay continua kita matene paz y desarollo na de aton lugar de operacion,” Si Vargas ta habla. (B. Garcia)