Veinte mga armas de fuego de diferentes calibre sin licencia el voluntariamente ya rendi con el mga personajes del 1st Mechanized Infantry Battalion (1MIB) el mga residentes del municipio de Talitay, Maguindanao del Norte, asegun con el militar del Lunes.
Asegun con Teniente Coronel Robert Betita, el comandante del 1MIB, el exitoso rendida del mga armas de fuego es resulta del intensificao campania contra pusil sin licencia con el ayuda del programa de manejo del Small Arms and Light Weapons (SALW).
Asegun con Betita, con el entrego del mga pusil ya hace del Sabado na municipal hall na Barangay Poblacion, Talitay, Maguindanao del Norte.
El mga armas de fuego que ya rendi ta inclui dos rifles de sniper de calibre .50 milimetro, siete rifles M-14, tres rifles Garand, tres lancador de granadas, un escopeta de 12 balinas, dos calibre .38 revolver, un calibre .22 pistola y diferentes clase de bala.
Si Betita ya presenta con el mga rendido armas de fuego con Coronel Ricky Bunayog, el interino comandante del 601st Infantry Brigade, durante un ceremonia na municipal hall del Talitay.
Durante el presentacion del mga pusil, presente tamen el mga oficiales del municipio y del mga barangay de Talitay, y mga personajes del policia del mencionao municipio.
“El rendida del mga pusil es un prueba cay ta subi el confiansa del de aton mga compoblanos na paz y orden que ta promova kita,” Si Bunayog ya habla. (B. Garcia)