Ya aresta con sinco personas y ya confisca mas de P5.1 milyones contrabando el mga pulis na un campanya contra “smuggling” aqui na ciudad del Zamboanga.
Asegun con Police Colonel Alexander Lorenzo, el director del Zamboanga City Police Office, cay con el aresto y confiscacion del contrabando ya ase maga alas 2:50 Miyercoles aga na mar del Barangay Cawit, este ciudad.
Si Lorenzo ya nombra con el sinco aresta personas como el siguientes: Yusop Abdulmaid, 26; Sudisin Usman, 40; Aberkhan Unda, 34; Alsidi Absara, 25; y si Ilahan Muntasir, 34.
Base na investigacion, el mga personajes del 2nd Zamboanga City Mobile Force Company (2ZCMFC) ta conduci patrulya na la mar cuando ya columbra sila con un jungkong que tiene el marka “Fazza 4.”
Asegun con Lorenzo ya descubri mga personajes del 2ZCMFC cay lleno de cahon de cigarillo cuando ya inspecciona sila con el jungkong estaba na Jolo, Sulu y de camino para aqui na ciudad de Zamboanga.
Enseguidas ya aresta con el sinco tripulante del jungkong y ya confisca con el cargamento despues que ya falya sila presenta documento del mga cigarillo.
El jungkong ta carga 147 cahon de diferente clase de cigarillo que tiene el estimao cantidad de P5,145,000.
El mga tripulante, mga ciragillo incluwido el jungkong ya pone bajo na custodiya del 2ZCMFC para el propio documentacion y esperansao entrega canila para na Buro de Aduana. (B. Garcia, photo courtesy of 2ZCMFC)