Sinco antes miembros del Moro National Liberation Front (MNLF) quien ya queda ya mga milicianos el ya recivi nuevo uniformes de batalla desde’l 101st Infantry Brigade (101Bde) na provincia de Basilan, asegun con militar del Jueves.
El sinco nuevo miliciano ya recivi de ila nuevo uniformes cuando ya visita sila de cortesia con Brigadier General Alvin Luzon, el comandante del 101Bde, del Domingo na Campo Luis Biel II na Barangay Tabiawan, ciudad de Isabela, Basilan.
El 101Bde ya habla, el sinco antes miembros del MNLF recientemente ya gradua como mga CAFGU Active Auxiliaries (CAAs).
Durante el junta, el 101Bde ya habla, ya comenda si Luzon con el de ila exitoso transicion y ya hace canila acorda de ila responsibilidades como nuevo miembros del fuerza de milicia del Fuerza Armada del Filipina, o AFP.
Si Luzon ya enfatiza canila el importancia de formentar camaraderia con el de ila uban CAAs na de ila designao unidades y mantene humildad na de ila comunidades.
Ya anima tamen si Luzon canila para guia con ejemplo y asegura cay de ila acciones hay contribui na unidad y paz na de ila respetivo lugar.
El 101Bde ya habla, el visitada de cortesia ta demostra el colectivo dedicacion para sostene progreso y formenta harmonia na provincia del Basilan. (B. Garcia)