Dos personas el ya muri mientras un pulis el irido na un tirahan que ya socede antes del año nuevo na costa weste del ciudad de Zamboanga, asegun con el policia del Jueves.
Si Coronel Kimberly Molitas, el Zamboanga City Police Office (ZCPO) director, ya habla el tirahan ya socede enfrente del parroquia na Zona 1, Barangay Ayala, 16 kilometros oeste del City Hall.
“En el advenimiento del año nuevo, el ZCPO ya designa con mga personajes para man campaña contra el uso de pusil y rebentador para garantiza un segurao celebracion,” si Molitas ya habla.
“Mientras ta rendi servicio, un incidente de tirahan ya ocuri na Zona 1, Barangay Ayala, ciudad de Zamboanga antes del media noche envuelto si Senior Master Sergeant Ryan Mariano, un miembro del Zamboanga City Polie Station 9 (ZCPS9) Special Drug Enforcement Team (SDET), y dos desconocidos hombre suspechao muntao na un motorciclo,” ya omenta si Molitas.
Si Molitas ya habla, el chufer del motorciclo ya muri na lugar del tirahan mientras el doctor ya declara muerto su compañero apenas llega na hospital.
Si Molitas ya identifica con el suspechao con quien ya declara el doctor muerto apenas ya llega na hospital como si Haber Tating, un residente de Zona 5, Barangay Ayala.
Asegun con Molitas, si Tating tiene pendiente orden de aresto por el crimen de dos cuentas de matansa y incluido tamen na lista del mga suspechao de droga del ZCPS9.
Si Molitas ya habla, tiene pa sila que determina el identificacion del muerto compañero de Tating.
“Su valienterias y exemplifica el dedicacion del de aton oficiales de agentes de ley para salvaguarda con el comunidad masquin bien delicao,” si Molitas ya habla.
Mientras tanto, si Molitas ya extende su profundo gratitud con todo’l valiente personajes del policia por el del ila inquebrantable dedicacion para garantiza el seguridad del publico y defensa del justicia. (B. Garcia)