El programa del aka-27 Summer Learn to Play a Sports ya termina ya del Sabado donde el 4,500 mga joven aspirante atletas ya completa con el un mes libre clinica de deportes.
El Alcalde John Dalipe, na su mensaje que ya le si Doctor Cecil Atilano, el director de deportes del ciudad, ya felicita con el mga participantes del programa por el de ila determinacion, impulsando canila para continua perfecciona de ila capacidad y queda atleta de buen calidad quien puede dale orgullo y honor con el ciudad de Zamboanga.
Ya reitera si Dalipe cay comitido su administracion na desarollo del mga jovenes y deportes para tene buen futuro el mga nuevo generacion.
El mga aspirante atletas ya demostra el de ila capacidades na diferente deportes durante el actividad culminante del Sabado.
El mga deportes que ya demostra mga aspirante atletas ya inclui el basketball, nuay thai, karate, pencak silat, taekwondo, gymnastics, y dance sports.
El mga entrenadores y el mga participantes del programa ya recivi certificos de finalizacion durante el actividad culminante. (B. Garcia)