Muerto na un incidente de tiroteo el un 42 años residente de Barangay Bolong, en este ciudad de Zamboanga, asegun con el pulisiya local.
Asegun con el report del Zamboanga City Police Station 3 (ZCPS3) el incidente ya ocuri mga alas 12:47 del Huwebes madrogada na Purok 4, Barangay Bolong na costa este del ciudad.
El ZCPS3 ya nombra con el victima como si Lloyd Erigbuagas, un residente de Sitio Entrada, Barangay Bolong.
Base na investigacion, de camino si Erigbuagas pa bolbida na su residencia estaba na un velacion cuando ya tira con ele el un desconosido armao persona.
Con Eribguagas ya tupa el tiro na pescueso que ya causa su enseguidas muerte.
Asegun con el ZCPS3 el suspechao ya escapa y ta esta desconosido hasta ahora.
Ya recuri tres capsula de calibre .45 pistola na lugar del crimen.
El pulisiya ta continua el investigacion para determina si cosa el motivo y si quien el suspechao del incidente.
(B. Garcia, photo courtesy of Zamboanga City Police Station 3)
