Ya aresta el pulisiya con un notorioso “drug pusher” y ya confisca suspechao shabu y pusil con mga bala na un implementacion de “search warrant” na ciudad de Lamitan, provincia de Basilan.
Asegun con Lieutenant Colonel Arlan Delumpines, el hefe del pulisiya na ciudad de Lamitan, con el arestao suspechao ya conose como si Gilbert Chavez alias Troy Chavez y alias Ed Chavez, 36 años el edad.
Asegun con Delumpines cay con Chavez ya aresta na Sitio Kilometro 20, Barangay Maloong San Jose, ciudad de Lamitan, mga alas 5 del Huwebes aga.
Asegun con Delumpines cay durante el implementacion del search warrant, ya puede recubri mga operativas valor de P34,000 suspechao shabu, un calibre .38 revolver con sinco bala, dos bala de calibre 40-millimter grenade launcher, tablet y celpon, un samurai, un motorcyclo y otro pa cosas na uso de shabu.
El search warrant por violacion del leyes de droga illegal y armas de fuego ya dale el un jusgado del ciudad de Isabela na provincia de Basilan del Huwebes.
Asegun con Delumpines cay detenido ahora si Chavez myentras asperansao presenta formal asunto encontra con ele na jusgado.
(B. Garcia, photo courtesy of Lamitan City Police Station)
