Cuarenta’y uno miembros del Bangsamoro Islamic Freedom Fighters (BIFF) el ya rendi con mga autoridad na provincia del Maguindanao del Sur, asegun con el militar del Sabado.
Asegun con el 6th Infantry Division (6ID), el mga miembros del BIFF, quien mga siguidores del facciones de Bungos y Karialan, ya rendi con el mga personajes del 92nd Infantry Battalion (92IB) del Jueves na Barangay Salbu, Datu Saudi Ampatuan, Maguindanao del Sur.
El 6ID ya habla, el rendidores BIFF simbolicamente ya compromete en el paz por medio de entregar de ila mga armas de fuego en repuesta con el llamada del gobierno para bira bajo na poder del ley.
El mga rendidores BIFF amo mga residentes del varias municipios na provincia del Maguindanao del Sur y Special Geographic Area del Bangsamoro Autonomous Region in Muslim Mindanao (BARMM).
Asegun con el 6ID, si Teniente Coronel Christian Cabading, el comandante del 92IB, ya presenta con el 41 rendidores BIFF con Major General Cerilo Balaoro, Jr., comandante del 2nd Infantry Division (2ID), quien ya visita na base de operaciones avanzada del batallon del Jueves na Barangay Salbu, Datu Saudi Ampatuan.
Si Balaoro ya apela con el mga rendidores BIFF para completamente abarca con el de ila transicion y contribui na progreso del de ila communidades.
El 6ID ya habla, cada uno del 41 rendidores BIFF enseguidas ya recivi ayuda dede con el gobierno local y del BARMM para suporta con el de ila transicion para na un pacifico y productivo vida dentro del de ila comunidades.
El 92IB del 2ID es adjunto con el 1st Brigade Combat Team del Army y ya ponde bajo el control operacional del 6ID. (B. Garcia)