El Departamento de Trabajo y Empleo, o DOLE, ya distribui P180,000 valor de “livelihood kits” con seis microempresas na provincia del Zamboanga del Sur, asegun con un alto oficial del DOLE del Sabado.
Si Albert Gutib, el director regional del DOLE, ya habla el livelihood kits ya distrbui del Martes na DOLE Zamboanga del Sur Field Office y el mga recipientes amo mga miembros del microempresas desde’l mga municipios de Tambulig y Vincenzo Sagun.
Asegun con Gutib, el ayuda que ya proporciona bajo el DOLE Adjustment Measures Program (DOLE-AMP), ta inclui herramientas, equipo, y materiales adaptados de diversos emprendimientos: cocina comercial industrial, reparacion de diutay makina, jardineria, venta por menor de arroz, operaciones de tiendas comunitaria, y procesamiento de carne.
“Este iniciativa tiene el objetivo para amplia el operaciones, genera ingresos estables para con mga dueños de negocios, y crea oportunidades de empleo local, fomentando autosuficiencia y crecimiento economico na comunidad,” si Gutib ya habla na un anuncio.
Si Gutib ya habla, el mga recipientes del livelihood kits amo mga participantes programa de
DOLE’s Technical and Advisory Visit (TAV), un iniciativa practica donde mga representantes del DOLE ya visita con mga microempresas para promove cumplimiento con mga estandartes de mano de obra.
Asegun con Gutib, por medio del mga seminar y herramientas de autoevaluacion, el TAV ta educa con mga dueños de negocios sobre mga reglamentos na lugar de trabajo, ofreciendo orientacion personalizada para cumpli con este mga estandartes.
“Con este mga recursos, el mga beneficiarios ahora ta esta mejor equipados para hace creci de ila negocios y contribui na economico local,” si Gutib ya habla. (B. Garcia)